Este recoñecemento premia aquel momento, acontecemento ou situación vivida no Concello da Estrada que conseguise xerar unha especial repercusión social, entusiasmo e participación cidadá. Ten como obxectivo pór en valor eses instantes únicos que fixeron «rebumbio», xa sexa polo seu carácter emotivo, divertido, sorprendente ou pola súa difusión, o sentimento de orgullo colectivo xerado e a lembranza que deixou na vida social do concello.

Este recoñecemento distingue á persoa, colectivo ou entidade da Estrada que destaque polo seu uso das redes sociais como ferramenta de comunicación, difusión e promoción positiva do concello. Ten como finalidade pór en valor a creatividade, a constancia e a capacidade para xerar contidos de interese que visibilicen a vida social, cultural, deportiva ou económica local. Valorarase especialmento o impacto e o alcance das publicacións, a orixinalidade dos contidos, a interacción coa comunidade e a transmisión de valores positivos e de identidade estradense no ámbito dixital. Este galardón premia a aquelas persoas, entidades ou iniciativas que, a través do seu labor comunicativo, contribuísen de maneira destacada a dar a coñecer, promover e poñer en valor a vida, as tradicións, a cultura e a identidade da Estrada. Valorarase a calidade, creatividade e alcance das accións realizadas, así como o seu impacto na proxección positiva do municipio.

Categoría na que se premiará o correcto emprego do idioma galego como lingua de comunicación no espazo dixital. Este galardón recoñece a persoas, colectivos, empresas ou entidades que destacan polo seu compromiso coa promoción e o uso da lingua galega no ámbito da comunicación. Valorarase a creatividade, calidade e efectividade dos seus proxectos ou iniciativas que contribúan á normalización e visibilización do galego como vehículo de expresión e cultura.

Categoría na que se premiará o emprego do humor como recurso comunicativo. Esta categoría premia ás persoas, colectivos ou iniciativas que destacasen pola súa creatividade e talento no ámbito do humor, utilizando a comunicación como ferramenta para entreter, conectar e provocar sorrisos. Valorarase especialmente a orixinalidade, a conexión co público e o uso do humor como medio para transmitir mensaxes con impacto positivo.

Este premio recoñece a empresas, emprendedores ou profesionais que destacasen pola súa estratexia en redes sociais para promocionar o seu negocio na Estrada. Valorarase a creatividade, calidade dos contidos, interacción coa comunidade e o impacto positivo na visibilidade e crecemento do negocio local.

Este premio recoñece a comunicación levada a cabo no eido deportivo do Concello da Estrada coa intención de pór en valor a difusión da vida deportiva local. Valorarase o achegamento da actividade deportiva ao público, con especial fincapé na transmisión de valores deportivos.

Este galardón ten por obxecto distinguir a mellor proposta educativa desenvolvida no Concello da Estrada, aquela que destaque pola súa calidade, innovacción e impacto positivo na comunidade. Ten como obxectivo pór en valor aquelas iniciativas que contribúan ao desenvolvemento persoal e académico, fomenten a aprendizaxe activa e inclusiva e promovan valores como o respecto, a igualdade, a cooperación e o pensamento crítico. Valorarase especialmente a súa capacidade para achegar a educación á cidadanía e xerar un impacto duradeiro no contorno social.

Este premio distingue a iniciativa cultural impulsada no Concello da Estrada que sobresaia pola súa creatividade, orixinalidade e contribución á dinamización cultural local. Pretende pór en valor aquelas accións que fomenten a participación cidadá, a difusión da cultura e a posta en valor do patrimonio cultural, material e inmaterial. Valorarase o seu impacto na vida cultural do concello, así como a capacidade para achegar a cultura a públicos diversos e promover a identidade cultural local.